مؤخرًا العلاقات بقت معقدة بدرجة كبيرة وأي حد بيدخل أي علاقة بيحاول على قد ما يقدر يحافظ على نفسه من الأذى والـ “تكسكة” عشان كده انتشر في الفترة الأخيرة مصطلح جديد وهو الـ”ريد فلاج” (Red Flag) أو الإشارات والعلامات اللي بتظهر على شخص عشان تاخد بالك وماتدخلش العلاقة دي، فمن الأحسن ليك ولينا وللكوكب كله إنك ماتتجاهلش الـ”ريد فلاجز” دي وتعمل نفسك مش شايفها.
بس في نفس الوقت تم ابتذال كلمة “ريد فلاج” وبقت تتقال على أي تصرف مش عاجب الطرف التاني عشان يخلع من العلاقة، وعشان نحط للكلمة دي إطار معين وتطلع تجري فعلا لما تلاقي “ريد فلاج” حقيقي، تعالى/تعالي نقولك إيه هي الـ”ريد فلاجز” اللي في العلاقات أو في بداية العلاقة حسب ما قال موقع “self”:
1- لو شخص مستعجل أوي في العلاقة:
لو الطرف التاني بيحاول يزقك عشان كل خطوة في العلاقة تمشي بشكل سريع وتعدوا مراحل بسرعة سوا أو كان واخدك “ريباوند” عشان ينسى العلاقة اللي قبلك، فبلاش منه.
2- بيحاولوا يوقعوا بينك وبين أهلك أو أصحابك:
أي شخص بيحلق عليك وعايز ياخدك كلك لنفسه طبعا بلاش منه قبل ما يدخل في حياتك أكتر ويبهدلك كل علاقاتك باللي حواليك وساعتها هيبقى بهدلك أنت كمان!
3- مش مهتم بيك أو بكلامك:
فيه أبحاث ودراسات اتعملت على المتجوزين ولقت الدراسات دي إن من أسباب الطلاق هو عدم اهتمام الأطراف بكلام بعض وإنهم مابيحترموش بعض.
4- بينتقد كل علاقاته اللي قبل كده:
أغلب العلاقات بتنتهي بشكل سيء أوي لدرجة إننا بنفضل مش قادرين نتخطاها لمدة سنة أو اتنين، لو الشخص اللي هيدخل معاك علاقة جديدة بيوصف أي علاقة له قبل كده أو كل إكساته إنهم سيئين أو مجانين في كل مرة بيتكلم عليه فده دليل على إن المشكلة فيه هو مش فيهم.
5- بيقلب شخص غريب في الخناقات:
لما بيحصل خناقات أو اختلاف بينكوا بيقلب شخص أنت مش عارفه، وممكن يوصل الموضوع إنه يشتمك أو بيناديك بألفاظ وحشة، فده دليل على عدم الاحترام فلو لقيته خد بعضك واخلع.
6- قاسي مع أهله:
كل الناس بتكافح مع أهلها في بعض الأحيان وعندهم مشاكل معاهم بس ده مايمنعش إنه يبقى بيحترمهم أو كويس معاهم، فخلي بالك من الأشخاص اللي مابيحترموش أبوهم وأمهم.
7- يبقى قلاب من غير سبب:
عارف الأشخاص اللي بتبقى بتعاملك وحش طول اليوم وبعد كده في لحظة يتحولوا يبقوا كويسين معاك ويحبوك ويقلبوا تاني عليك من غير أسباب برضه.. ريد فلاج ابعد عنهم.
8- مواعيد نومهم مختلفة عنك:
لو أنت شخص بتصحى بدري ويومك بيبدأ الصبح عادي والطرف التاني بيصحي الساعة 10 بليل “بغض النظر عن السبب” فأنتوا كده يادوب تلحقوا تسلموا على بعض مش تدخلوا علاقة وتستنوا تبقى علاقة ناجحة كمان، فحاول يبقى بلاش منه عشان مش هتلاقيه أصلا.
9- بيخبوا كل حاجة:
بلاش برضه الأشخاص اللي بتخبي كل حاجة صغيرة في تفاصيل حياتها وبيتعامل مع حياته إنها أسرار عسكرية، تخيل كده هتتعاملوا إزاي مع الحاجات الكبيرة بعدين؟!
10- خانوا شريكهم الآخير معاك:
لو كان الطرف التاني مرتبط وكان فيه بينكوا بدايات لعلاقة جديدة وفركش عشان يدخل معاك في علاقة.. أوعى!
11- لو بيطلب منك باسورد الموبايل والإيميل والسوشيال ميديا:
ليه ممكن ترتبط بحد مش واثق فيك لدرجة إنه بيفتش وراك في كل حاجة، ما بلاش العلاقة دي من قبل ما تبدأ فعلا.
12- بيحسسك بالذنب في كل فرصة تيجي:
فيه بعض الناس عندهم موهبة فظيعة إنهم يقدروا يحسسوا أي حد تاني بالذنب وإنه هو المسؤول عن كل غلطاته في الحياة.
13- بيحسسوك إنك غبي:
أسوأ ناس على الكوكب هما اللي بيحرفوا الحقايق عشان تشك في ذاكرتك أو في الواقع، وتكنيك اللعبة دي هو السخرية من أفكارك وآرائك.
14- بيرفضوا إنكم تعلنوا علاقتكوا:
فيه ناس فعلا مابيحبوش ينشروا حياتهم على السوشيال ميديا ولا يتكلموا عنها كتير بس ده مختلف عن إنه مايحبش يعلن عن العلاقة اللي بتكون واضحة زي الشمس!
15- عايزينك طول الوقت تطمنهم:
كلنا مش آمنين على مستويات مختلفة ومفيش مشكلة فيك لو حد حس الإحساس ده منك، فلو لقيت الشخص بيزن عليك طول الوقت عشان عايزك تحسسه بالأمان فاعرف إن المشكلة فيه.
16- مابيقدرش يعتذر:
ديلك في سنانك واجري طبعا…
17- عندهم مفاهيم مختلفة عن العلاقات والوفاء فيها غيرك:
لو الطرف التاني شايف إنه ممكن يتكلم مع أي حد وبـ”فليرت” معاه عادي وإن دي مش خيانة في حين إن ده ماينفعش معاك فدي اختلافات هتبهدل العلاقة.. فدي ريد فلاج واضحة أهيه مش مستاهلة.