"الحياة في زمن الكورونا"


عزيزي القارئ وانت قاعد في البيت بتقوم بدورك كمواطن مسئول في مكافحة الكورونا ... تلاقي صديقك بيكلمك بيقولك
-تعالي علي القهوة..
-قهوه ايه ونيله ايه.. 😆 يا عم العالم في حاله طوارئ وأنت جاي تقعد علي القهوة 😮
-بقولك متخافش أطمن دول بيعصروا ليمون علي حجر الشيشه علشان يعقموه 😅
-ياااااا نهاااااار اسود... هو الحجر عنده نقص فيتامين سي😅😂
طبعا كحد مسئول بتقفل السكه في وشه وتقرر أن انت متكلموش تاني لانه بقا خطر عليك وعلي حياتك وحياتي..😂 وعلي فرصنا في الحفاظ علي جيناتنا.
تخيل عزيزي القارئ يجيلك كورونا قبل ما تتجوز تبقي مأساه (بعد إذن نهاية العالم يا شباب ملحقتش أتكااااااثر)😂😂
واحد يسأل هو الموضوع خطير؟🤔
عزيزي القارئ من الأرقام اللي بنشوفها الوضع الحالي في منتهي الخطورة يعني اللي شوفناه في ايطاليا وإيران يرعب دا اللي بالارقام وصعب اوي أن احنا نهرج مع هذا الكلام.
العالم زمان كان أكثر أماناً، زمان كان الواحد يعطس يتقاله يرحمكم الله، ويأكل من غير ما يغسل إيده ويكح من غير ما يغطي بؤقه، أيام ما كان لو حد سمعك بتقول سنتايزر بصوت عالي كان يقولك مالها البطارية😂😂
كان هناك حاله من التناغم مع الجراثيم والميكروبات والتعايش السلمي مع البكتريا والفيروسات الناس كانت حلوه يا عاااااااااااااطف😄😂
ولكن أيها القارئ الجميل الوضع قبل ١١ مارس كوم وبعدة كوم تاني خالص منظمه الصحه العالمية أعلنت أن COVID_19 وباء عالمي ... جائحه، رئيس المنظمة طالب الدول بإجراءات حاسمة وعاجله للسيطرة علي وضع ابتدي يخرج عن السيطرة ومن ساعتها والدنيا اتقلبت وكل دوله بدأت تعلن عن الإجراءات اللي شايفاها مناسبه علشان تحمي مواطنيها وتوقف إنتشار الفيروس.
بعض الدول قفلت علي نفسها ومنعت الدخول أو الخروج، دول تانية أعلنت حالة طوارئ، ودول تالتة فرضت حظر التجوال ومنعت المواطنين من النزول إلا في الضرورة القصوي.
وتم تأجيل وإلغاء المسابقات الرياضية، وشركات كتير زي Google و Amazon و Facebook أعلنوا أن الموظفين يا أما كلهم يا أما جزء منهم هيشتغلوا في البيت work from home  في محاولة لمنع بقدر المستطاع إنتشار العدوي ولكن كل دا أيها القارئ الجميل مكانش كفايه للقضاء علي الفيروس اللعين اللي ممكن بسبب الإنتشار السريع يتسبب في إنهيار منظومة الرعاية الصحية، ودا خلي رئيس وزراء بريطانيا Boris Gohnson يحزر العائلات البريطانية انهم ممكن يخسروا أحبائهم قبل ميعادهم "سأكون صريحاً معكم أيها البريطانيون بأن أسر كثيره ستفقد احباء لها مبكراً".
وخلي الرئيس الفرنسي Gmmanuel Macron يقول " نحن في حاله حرب"
وخلي سيدة أوروبا Angela Merkel تقول أنها تتوقع أن الفيروس هيصيب٧٠% من الشعب الألماني.
تيجي انت عزيزي القارئ تقولي دا مش أول وباء يعدي علينا... فهذا الفيروس اللعين طبقاً ل Anthony Fauci احد كبار العلماء فيما يخص الطب والأوبئة في الحكومة الأمريكية ورئيس المعهد الوطني للحساسية والأمراض المعدية (الكورونا أخطر من الأنفلونزا 10 مرات).
عزيزي القارئ انت اكيد بتسأل نفسك إيه تأثير وباء بهذه القوة والحجم علي العالم؟ وتعمل ايه انت يا مواطن علشان تتجنب الإصابه بيه؟
بالنسبه لسؤال تعمل ايه ... تغسل ايديك وتقعد في بيتك 😁
اما بالنسبة لتأثير الكورونا علي العالم... فمتوقع يكون أكبر من عدد الإصابات والوفيات لأن وباء بهذا الحجم متوقع يكون ليه آثار علي شكل العالم اللي نعرفه النهارده.
إجراءات مكافحة الفيروس حطت العالم كله في موقف واحد ومفيش قطاع او دوله او مجموعة متأثرتش باللي حصل يعني مثلا بالنسبة للتعليم....
طبقاً لتقرير صدر من اليونسكو أن أكتر من 100 دولة قفلت المدارس والجامعات علشان تحد من إنتشار الفيروس ودا أكتر من حوالي 862 مليون طالب .. متخيل الحجم يعني حوالي نص طلاب العالم.
اما بالنسبة للاقتصاد فالدراسات بتتوقع أن الكورونا هتؤدي إلي خفض إجمالي الناتج المحلي العالمي (Global GDP) بقيمه تتراوح 2.4 تريليون دولار ل 9 تريليون دولار انت متخيل الرقم وحجم الخسائر😲😣
عزيزي انت بتقرأ هذا الكلام ومضايق شويه من قعده البيت واكيد زهقت ... انت عندك كل الحق انك تزهق من القعده في البيت فعلا تلاقيك عملت كل الحاجات اللي ممكن تتعمل ولسا زهقان 😂😂
بس عزيزي القارئ الجميل فكر فيها انت مش بس بقعدتك في البيت بتحمي نفسك وبتحمي غيرك من الكورونا انت كمان لأول مره في التاريخ الحديث العالم يهدي شويه والعجله اللي كانت عماله تلف أسرع وأسرع بطئت ولو مؤقتاً.
فأرجوك عزيزي خليك قاعد في البيت احمي نفسك واحمينا من الكورونا علي قد ما تقدر🙏😁

Share To:

Post A Comment:

0 comments so far,add yours

ملحوظة: يمكن لأعضاء المدونة فقط إرسال تعليق.