كتبت - إيمان السيد
باحثة وكاتبة صحفية مهتمة بالشأن النفسي
"حاسس إن فيه حد أنا بس اللي شايفه راكب على كتفي، مش مجرد حد تقيل شايله فوق كتافي وماشي، لأ ده كمان حد شرير مغمي عيني، بحاول أشوف الدنيا من بين فروق صوابعه، بعافر والله علشان أشوفها، ساعات بقدر أقاوم وأشوف النور، وساعات بشوفها ضباب."

ده كان رد صديقي على رسالتي اللي بطلب فيها منه يوصف لي الاكتئاب من وجهة نظره، بما إنه مشخص من قبل إخصائي نفسي بإنه بيعاني من الاكتئاب، يمكن إجابته كانت قصيرة لكنه قدر يرسم لي صورة مجرد تخيلها والتفكير فيها مرعب.
بعد ما طلبت من صديقي ما يقولش لوالدته الوصف ده علشان ما تعتقدش إنه "ملبوس" أو "راكبه شيطان" سألته عن نوع الاكتئاب اللي هو مصاب بيه لكنه معرفش، وفي الغالب كتير من الناس مش عارفة إن زي ما الحزن له لون وروايح -على حد قول محمد منير يعني-  فالاكتئاب له أنواع وتصنيفات، الناس أصلًا بتخلط بين إحساس الحزن وبين الاكتئاب، فبقى أي حد مهموم شوية بيقول إنه مكتئب، وللأسف الاعتياد على الكلمة بيقلل من أهميتها، وبيعرض مريض الاكتئاب بجد لخطر التغافل والتهاون مع حالته النفسية.
الاكتئاب، الاكتئاب الموسمي، عسر المزاج، ممكن نصنف الاكتئاب للأنواع التلاتة دول، وتحت كل نوع هنلاقي تفرعات تانية، والكلام ده وفقًا لدكتور محمد الشامي استشاري الأمراض النفسية ومؤسس قسم الطب النفسي بمستشفى سرطان الأطفال 57357 والمدير الطبي لموقع شيزلونج، هنحاول نتكلم عن كل نوع بشكل مختصر ومبسط هتوضح لنا الفروق بينهم، لكن مش هاتدينا القدرة على تشخيصهم، لإن الأعراض في الأنواع التلاتة بتتشابه إلى حد كبير، فيما عدا شوية فروق في الأعراض بين كل نوع والتاني، ده غير معايير تشخيصية تانية، علشان كده الشخص الأجدر لتشخيص نوع المرض هو الطبيب النفسي.
•الاكتئاب
الاكتئاب هو اضطراب مزاجي بيسبب للمصاب بيه شعور دايم بالحزن وفقدان الاهتمام، وبيأثر على إحساسه وتفكيره وسلوكه، وللأسف ممكن يسبب له مشاكل كتير سواء عاطفية أو جسدية، وبيتسبب له في صعوبة في إنه يقوم بالأنشطة اليومية العادية، وبيصيبه بأعراض وآلام جسدية من غير أسباب عضوية، زي الصداع مثلًا ووجع الضهر، وأحيانًا بيخليه يحس إن مفيش معنى للحياة، وإنه مش عايز يعيش، وبيدفعه للتفكير في الموت، والانتحار!
النوع ده من الاكتئاب ممكن يصيب الإنسان مرة واحدة في حياته، ومع ذلك فغالبية المصابين بيه بيعانوا من نوبات متعددة من الاكتئاب، وأثناء النوبات دي بتحصلهم الأعراض المزعجة للاكتئاب معظم اليوم، كل يوم تقريبًا، وبالتأكيد ده بيأثر على شغلهم وعلاقاتهم وحياتهم عمومًا بشكل سلبي.

•عسر المزاج
النوع ده بقى من الاكتئاب بيبقى مزمن رغم إنه في حدته بيكون أقل من النوع اللي قبله، أعراضه بتروح وتيجي على مدار سنين، وفي كل مرة الأعراض بتستمر لمدة شهرين على الأقل وممكن تدوم لسنين ويمكن علشان كده اسمه الاضطراب الاكتئابي المستمر، والأعراض دي بتتمثل في فقدان الاهتمام بالأنشطة اليومية العادية، وفقدان الأمل، وضعف الإنتاجية، وقلة الثقة بالنفس، والإحساس بعدم الكفاءة عمومًا، وكل ده بيخلي المصاب بيه صعب يتبسط حتى وقت المناسبات السعيدة، وبتخلي الناس شايفينه شخص كئيب وبيشتكي كتير، أما هو فشايف حياته من ورا فلتر أسود كئيب مكمل معاه معظم أيام حياته.
• الاكتئاب الموسمي
أما النوع ده من الاكتئاب فهو مرتبط بالتغيرات الموسمية، يببدأ وبينتهي في نفس الوقت من كل سنة، وبيخلي المصاب بيه معندوش طاقة، ومزاجه متقلب، الأغلبية من المصابين بالاكتئاب الموسمي بيعانوا منه مع بداية الخريف وبيستمر طول شهور الشتا، وده بتكون أعراضه زيادة في النوم، زيادة في الشهية، زيادة في الوزن، وإرهاق ونقص في الطاقة، وقليلين بيصابوا بيه في الربيع وبدايات الصيف، وده أعراضه بتكون أرق، وفقدان شهية، وفقدان وزن، إحساس بالقلق والضيق.

وأيًا كان نوع الاكتئاب اللي بتعاني منه فلازم تعرف واللي حواليك كمان يعرفوا إنه مش مجرد نوبة قريفة ومزاج وحش، ولا هو حالة عابرة وهاتروح لحالها، الاكتئاب محتاج مجهود ووقت علشان تعرف تتخلص منه، والموضوع ممكن يتطلب علاج لفترة طويلة، بس لازم يكون عندك صبر وإرادة خصوصًا لما تعرف إن معظم الأشخاص المصابين بالاكتئاب بيتحسنوا مع الانتظام مع العلاج سواء كان بالأدوية أو العلاج النفسي أو الاتنين سوا، بس المهم تعرف تبدأ العلاج.
صديقي أنا واثقة فيك وفي عزيمتك، وعارفة إنك أقوى من شبحك الافتراضي اللي فوق كتافك، متأكدة إنك هاتقدر تنزله وتتخلص من حمله وهاتتجاوزه وتمشي بعيد عنه، ومش هتبص وراك لإنك هاتبقى مشغول بحياتك اللي بقيت من غير الاكتئاب شايفها زاهية بوضوح.

Share To:

Post A Comment:

0 comments so far,add yours

ملحوظة: يمكن لأعضاء المدونة فقط إرسال تعليق.